Bo Kongra KOMKARê ya Bîstûyekan

Endam û alîgir û nunerên hêja û tekoşer,

Kongreya Bîstûyekan a KOMKAR’ê him ji aliyê şîar û him jî ji aliyên armanca kongre ve gelek giring e.

Şiara “Dest ji çekan bikşînin! Divê pirsa Kurd di nav aramî û aşîtiyê da bê gengeşîkirin!"

şiareka rastbîn e û ligel zirufên siyasiya Tirkiyê Kurdistan û herêma Rojhilata Navîn digunce. KOMKAR, bi civandina Kongra xwe ya Bîstûyekan di bin diruşma hanê, carekî dinê nişan da ku di heqê bûyer û pêşhatiyên Tirkiyê û Kurdistanê da hestyar e, xwe berpirs dizane û amade ye weki berê ji bona alikariya xebata azadî û demokrasiyê bike.

Endam û nunerên hêja,

Herwekî dizanin û kar û xebata we jî nişan dide, ku ji bona serketin û gihiştin bi armancê, mercê serekî rêxistin e. Eger xebat di bin pêşengiya rêxistinek rastbîn, demokrat û ligel zirufê guncav neyê meşandin, sernakeve. Rêxistin jî weki canliber zîndî ye, tê guhartin. KOMKAR jî ne ji vê yasayê der e. Ji ber vê yêkê biryara damezrandina KOMKAR EU biryareka rast û dirust e.

Ez piştrast im, ku bi damezrandina KOMKAR EU ve kar û xebata KOMKARan, KOMJIN û KOMCIWANan, ku di gelek welatên Ewropa da hene, bi rêk û pêktir û bi berhemtir dibin. Her weha demezrandina KOMKAR EU, dıbe qonaxeka giring e di warê pêkanina lobiya Kurd li Ewropa da.

Ez yêqin dizanim, ku hemu endam û alîgirên KOMKARê ji bêrê bêtir û germ û gurtir beşdarê xebata KOMKAR EU dibin û bi wî awayî erkên xwe yên netewî û demokratîk ci tînin.

Ez bi navê partiya xwe, bi dil û can  serketina Kongra ya Bîstûyekan a KOMKARê dixwazim.

Bijî KOMKAR EU

14.10.09

Mesud Tek

Sekreterê Giştî

.........

Ji bo 21´mîn Komcivîna KOMKARê

Mêvanên rêzdar,

Nûnerên hêja,

Hun di pêvajoyek gelek girîng da 21´mîn kongreya xwe pêktînin. Wek hun jî ji nêzîk ve dişopînîn ku îro li Kurdistana Bakur, pirsa kurd ji hemû wextan zêdetir tê qisekirin û ji bo çareseriya wî gengeşîyek aktîv tê kirin. Şik tuneye ku ev gengeşiya hemû rêxistinên siyasî û sivîl yên kurdan, çi li welat çi jî li derveyê welat hemû kurdan elaqeder dike. Loma jî kongereya we di wextek usa da girîgiya xwe hîn zêdetir dide nîşandan.

Her usa wek we di dawetnameya xwe da jî daye xuyakirin ku ev kongreya we, di heman wextê da bibe damezrandina konferderasyonek di navbeyna Komkarên ku li Ewrûpayê xebatên xwe didomîne. Ev yeka jî mizgîniyek gelek xweş bû û pîroz û serkeftî be.

Hêjayan,

KOMKAR´an, li hember zilm û zordestîya dijmin li ser gelê me li Kurdistanê, di nav 30 salan de, bi civîn, meş, konferans, bi grevên birçîtîyê û bi peyvendîyên bi partîyên siyasî û rêxistinên sivîl yê Ewrûpayê ra, bi kar û xebatên lobîyê ve, xwe kir dengê gelê kurd û di vî warî de rolekî taybet lîst.

Xizmetên ku KOMKAR`ê li dervayî welat, pêşkêşî ziman û çanda kurdî kirîye nayê înkarkirin. Ev xebata  bi xurtî xwe gihand hundurê welat jî. Îro li hundir û derva bi dehan rojname, malper û kovarên ku bi kurdî derdikevin hene. Di vê pêşketinê da KOMKAR an roleke baş û berbiçav listîye.

Belê, îro Komeleyên Komkarê 30 sal zêdetire li welatên Ewrûpayê ji bo gelê kurd kar dike.  30 sal xebat di karê komelayetiyê de ne hindik e û we Komkar´an di jiyana kurdên Ewrûpayê da cîhekî girîn girtiye.

Ji bo berdewamiya xebatek hîn baştir û Komkarek hîn xurtir, 21´mîn Kongreya we û damezrandin konfederasyona KOMKAR-EU yê ji dilve pîroz dikin û serkeftina we dixwazin.

Bijî KOMKAR

Partiya Sosyalîst a Kurdistan

PSK- Komîteya Derveyê Welat

...............

Ji bo Serokatiya Dîwanê

Em, Komcivîna 21an ya Yekîtiya Komeleleyên Kurdistanê-KOMKARê bi rêz û hurmet silav dikin.

Tekoşîn û meşa azadiyê ya gelê kurd, ligel hemû zext û bandorên hovane didome.

Ev meşa ku bi xwîn, agir, berxwedan û êşê hatiye ceribandin û mezin bûye û bi hêvî bihêz bûye, statukoya ku di sedsala borî de li dijî gelê me hat avakirin, hildiweşîne.

Nuha başûrê welatê me azad e û parçeyên din jî nêzîgî li azadiyê kirine.

Ev meş û tekoşîn, heta ku welatê me Kurdistan bi tevahî azad nebe û çarenûsiya xwe bi destê xwe tayîn neke, dê bidome. 

Hê li pêş me rêyeke direj heye ku em têde bimeşin.

Çi li nav welat û çi jî li derveyê welat ji her sazî û herkesî re bar û berpirsyariyek mezin divê.

Her çiqas ku em wezîfe û berpirsyariyên xwe bi kêrhatî bi cîh bînin, dê azadî ewqas nêzîktir bibe.

Şik û guman têde tune ku di deskeftiyên tekoşîna azadiya Kurdistanê de KOMKAR ciheke giring digirin.

Cihê kêfxweşiyê ye ku Yekîtiya Komeleleyên Kurdistanê-KOMKAR, ji bo pêwistiyên pêvajoyê bi cîh bînin û hê bihêztir bibin, di bin sîwana Konfederasyonê de tên bahev.

Bi vê mebestê em we û wan kesên ku ji bo vê yekê ked serf kirine, pîroz dikin û ji Komcivîna we re serkesftin hêvî dikin.

Girênendeyê Giştî yê Rojnameya Dema Nû

Arif Sevînç/Diyarbekir

Ji bo komcivîna KOMKAR

Hevalên delal,

Jî ser avabûna federasyona KOMKAR’ê li Elmanîya Federal vir da 30 sal derbaz bûn. Lê emrê hin komeleyên wê dirêjtir e, digihîje 35-36 salan. Ev emrekî dirêj e ku bi kar û xebateke têr û tijî derbaz bû.

KOMKAR’ê di van 30 salan da ji bo hişyarkirin û rêzkirîna Kurdên li dervayî welat, ji bo parastin û pêşvebirina zman û çanda Kurd, ji bo nasindina pirsa Kurd di raya giştî ya Ewrûpayê da, ji bo piştgirîya berxwedana gelê kurd di her çar parçeyê welat da, her usa jî jı bo pıştgirîya hêzên demokratik bı awayekî giştî, kar û xebateke hêja kir.

Ji bo vê yekê federasyonê, yek bi yek komeleyên wê, herçî kesê ku di vî karî da para wan heye pîroz dikim, hevalên ku di vê rê da jîyana xwe dan, bi hurmet tînim bîra xwe.

KOMKAR’ê di van 35 salan da wek sazîyeke welatparêz û demokratîk bingeheke xurt danîye, di nav refên gelê kurd da her usa jî di nav dostên Kurd da bi navekî baş hatîye nasîn. Ez hêvîdar im, ev kar û xebat bi îro şunda jî berdewam be, geştir û hêztir be.

Nuha federasyona we Komcivîna xwe ya 21’an çêdike û hazirîya avakirina konfederasyonekê dike tevî komeleyên KOMKAR’ê yên dinê li Ewrûpa. Eva jî gavekî baş e, pîroz e, hêvî dikim bi serkeve.

Ji hemû berpirsîyar û endamên KOMKAR’ê ra, jî hemû beşdarên Komcivîna 21 ra silav dikim û ji we ra serketin dixwazim.

Kemal Burkay
Çirîya Pêşîn-2009

...........

Ji bo 21´mîn kongreya Komkarê

Nûnerên hêja, mevanên rêzdar,

Em baş dizanin ku Komkar, ji 30 salan zêdetir e ku li diayaporayê ji bo çand û zimanê kurdî, folklor û edebiyata  kurdî, pirsgirêkên civakî û her weha bo piştgiriya xebata azadîxwaz a gelê kurd, xebatên hêja dike.

Em di wê bariyêdane ku hevkariya rêxistin û dezgehên kurd li diyasporayê da, ji girgbûnê wêdatir, şertekiye ji bo serkeftina xebata kurdan li Ewrûpayê. Loma jî me wek Federasyona Komeleyên Kurdistanê li Sewêdê, bi Komkarê ra hevkariyek baş kir. Em hêvîdarin ev hevkariya me di rojên pêş da hîn xurtir be.

Em 21´mîn kongreya we ji dilve pîroz dikin û silavên germ yê FKKSê ji bo hemû endam û hogirên we  pêşkeş dikin. Daxwaza me kongreya  serkeftina we ye.

Bijî azadiya gelê kurd, 

 Bijî yekitiya kurdan,  

Bijî xebata rêxistinên kurdan li diyasporayê 

Federasyona Komeleyên Kurdistanê li Swêd- FKKS

----------------

Ji bo Serokatiya Dîwana Komcivîna 21. ya KOMKARê

KOMKAR, ku xwedî tekoşineke bi rûmet ya 30 salan e, meşa xwe ya bibiryar wek KOMKAR-EU wê bidomîne. 

KOMKAR-EU, wê bibe piştevan ji bo hevkarî û tevxebata tekoşin û koordînasyona kar û xebatên lobîtiyê ya gelê Kurd a derveyî welat. KOMKAR-EU her weha wê ji bo çareseriya pirsên Kurdên diyasporayê û ji bo xurtir kirina bandora Kurdan ya li ser siyaseta Ewrupî wê bibe lokomotîfek.  

Wek jinên KOMJINî diyar dikin, ku ji vir şûnda jî erkên ku dikeve ser milê me, gor hêza xwe emê bi dilxweşî bînin cîh û ji bo KOMKAR-EU serketin daxwaz dikin.

Bijî tekoşîna gelê Kurd ya bi rêxistinî!

Bijî KOMKAR!

13.10.2009

Birêvebiriya Giştî ya KOMJIN

..............

Ji Birêvebiriya Komîta Amadekar ya 21. Komcivîna KOMKARê ra

Hevalên Hêja!

Me dixwest em beşdarê kongra we ya 21 an bibin. Lê şert û mercan dest neda.

Em kongra we ya 21 ji dil û can piroz dikin.

Em ji mêj de kar û xebatên we yê hêja dişopinin. We hetani roja îro ji bona azadiya gelê Kurd gelek xebatên giring kirin.

Ev ked û xebata we wê neyê jibîrkirinê. Ya muhimtir û giringtir ew e ku, xebatên we yên hêja di nava pêvajoya dîroka tekoşîna Kurd de xwediyê şopeke ronî ye. We ji sî sal berê de, bi biryareke xurt, bi tekoşîneke bizanîn û bi berxedaneke hêja ve azadî, demoqrasî, wekhevî anî ziman. Îro jî hûn bi vî aliyê xwe yê ronî li dijî dagirkeriyê, diktatoriyê, li diji kevneperestiyê weka qelekî pola sekinîne.

Dirok ronahiya we, îro nebe sibê wê bireşîne ser rûyê Kurdan.

Îro ji her roj bêtir pêwîstiya gelê me bi rohaniyê heye.

Em, birêvebirên Weqfa Lêkolin û Çanda Kurd komcivîna we ya 21an ji dil û can ve pîroz dikin û serkeftinê diyar dikin.

Bi rêz û silavên hevaltiyê.

Dr. Yaşar Kilerci

Serokê Weqfa Lêkolîn û Çanda Kurd

............

Peyama Duheftînameya Agirî bo 21mîn Komcivîna KOMKARê

Hevalên hêja û xebatkar ên Yekîtiya Komelên Kurdistan – KOMKAR

Silav û rêzên germ û gurr ên me ji Kurdistanê ve bipejirînin

Nameya we ya vexwendina me bo beşdarîkirin di 21mîn komcivîna Rêxistina we ya têkoşer û çalak de gihîşt destê me. Pirr spas û pêzanîn...

Em bi dil û can, ji Kurdistanê ve pîrozbahiyên germ ên xwe pêşkêşî hemû xebatkarên KOMKAR û bi taybet beşdarên komcivîna 21mîn a yekîtiya we dikin û hêviya serkeftin di kar û xebatên wê kongrê de dixwazin.

Me gellek hez dikir ji Kurdistanê ve beşdarî komcivîna 21mîn a KOMKARê bibin, lê em bi vê peyamê, peymana dostînî, hevkariya hevbeş û hevxebatiyê bi we re îlan dikin.

Çalakî û xebatên berdewam ên KOMKARê ji bo me cihê rêz û hurmetgirtinê ne. KOMKAR yek ji wan saziyên Kurdistanî li Ewrûpayê ye ku gellek xizmetên bêhempa û mezin ji bo çand, kultûr û pirsa neteweyî ya Kurdan kiriye û cih û rola wê pirr xuya û berçav e.

Carek din, em lidarxistina 21mîn komcivîna KOMKARê pîroz dikin û hêviya serkeftin û berdewamiyê di xebatê ji we re dixwazin.

Digel rêz û hurmetên bêdawî….

Desteya Weşana Agirî

Kurdistan

01.10.2009